Ómissandi foreldrar

Ég átta mig stundum ekki á barnauppeldi fólksins í kringum mig. Kannski er það sökum þess hvernig ég var alin upp en ég á mjög erfitt með að skilja foreldra, hálffimmtugt fólk, sem smyr nesti handa fullorðnum börnum í menntaskóla, hirðir fötin þeirra úr herbergjunum og hringir í þau heim til að athuga hvort þau séu búin að fá sér að borða, og hafi ekki örugglega fundið það sem búið var að taka til handa þeim!!!

Ég ætla amk að ala börnin mín upp í að verða sjálfbjarga en ekki mömmu/pabba aular sem geta ekki gert neitt sjálf. Veit ekki hvort það er af einhverri hugsjón eða hreinræktaðri leti - nenni bara engan veginn að eyða lífinu í að smyrja nesti handa hálffullorðnu fólki.

Þetta segir kannski mikið um það að ég er ekki tilbúin til þess að eignast börn en satt að segja held ég að ég eigi ekkert eftir að verða fyrir persónuleika umskiptingu við að verða móðir. Letin rennur líklega ekkert úr mér með fylgjunni.

Svo hafa krakkar bara gott af því að sjá um sig sjálf - sérstaklega ætla ég að leggja áherslu á að dekra strákana mína ekki því margir strákar (já já og auðvitað stelpur - alltaf að vera með pólitíska rétthugsun hérna) eru svo sauðlatir og ósjálfbjarga að næstum mætti halda að þeir hafi verið prinsar á uppeldisárum sínum. Því segi ég: Mæður og feður landsins, sameinist í því að skapa almennilega eiginmenn handa kvenréttindakonum framtíðarinnar. Þær vilja enga mömmustráka!

Sé samt að það er mótsögn í þessu hjá mér - ég sjálf er sauðlöt (en held nú samt ekki alveg ósjálfbjarga) og bý reyndar með litlum prinsi sem hefur séð sig neyddan til þess að taka ábyrgðina á húsverkunum yfir á sig sökum skorts á húsmóðurvilja og hæfileikum hjá minni.
Samt er ég að mestu alin upp í að sjá um mig sjálf og laus við flest dekur.
Jæja ég kýs þá bara að láta kalla mig Frk. Ragnar Reykás héðan í frá og álykta sem svo að fólk eigi nú eftir að geta séð um sig sjálft þegar það flytur að heiman þrátt fyrir dekur heimafyrir - og öfugt. Fer samt ekki ofan af því að fólk ætti að eyða tímanum í eitthvað annað en að stjana við rassgatið á börnunum sínum - bara sjálfs síns vegna!!